時光飛逝，諗返起小惡霸初出生時我衣不解帶咁餵奶，開刀廿四小時後移動身體抱佢換片洗手換衫，出院後喊到我懷疑要送佢去急症室，頭半年點日揹夜揹令佢瞓覺。今日，小惡霸2歲喇，以上種種好似上世紀嘅事。
呢兩年朝夕相對秤不離陀一手一腳一點一滴，與其話建立母女情，我倒覺得我哋係一對最佳拍檔。由出世開始，表面上佢係個只可以依靠人先能夠生存落去，但有時出現些細節位令我發現，係要佢配合佢合作，先做得來。我哋係一個團隊。
有點樣嘅阿媽就有點樣嘅女，我好開心小惡霸長大成當我過完關跌咗身分證佢會指住地下提我嘅細心人。以及佢細個無數次半夜三更熟睡時喺我心口碌落床，並無對佢做成咩陰影同影響。XDD
再次感謝 P，冇佢，我一早崩潰咗。
我冇咩願望，只想來年大家更珍惜相對嘅時光，hea 呀玩呀，平安就好👻
圖：
某夜入睡前的傑作
俺相當滿意和驕傲～ 啊呵呵呵呵呵
生日快樂呀，小可愛！睇住佢哋成長真係好多驚喜(minus 啲叫人發狂既moment).來年繼續加油！
回覆刪除謝謝你 Joan！！我哋一齊努力，來年繼續多多指教 ;)
刪除生日快樂!!
回覆刪除原來你頭幾個月都咁惨架!! 我覺得真係地獄啊!! 但，而家真係超好湊就是了。
我開完刀好快就郁得餵奶。有人同我講，在香港開完刀出院已經唔使食止痛藥!! 我食足一個月啊!! 好唔明。
謝謝！！
刪除係呀，其實頭一年都好慘，一個接一個嘅挑戰呀，又對自己多質疑。不過當時一有精神寫blog就唔想提返，寧願記低搞笑嘢或者里程碑之類，咪好似冇咁囉。
我囡又係一歲識行之後越來越好湊呀！以前真係一日抱到黑，有時因為tum瞓覺有時因為佢要人理、悶想睇嘢但自己郁唔到。所以我先習慣成日去街，因為散步時我先反而可以放空休息 (汗) 亦因此而家好多時都會讚嘆：嘩，好好湊好易話為呀個囡，但可能人哋眼中係好小事。
我同你一樣係緊急開刀！開完刀幾個鐘姑娘就會抱埋嚟餵奶，但痛苦嘅原因主要係頭12個鐘都唔可以飲水，24個鐘後先開始食稀水般嘅流質食物，48個鐘先真正開始食嘢。但身體要造奶嘛，所以真係餓、渴得好慘！又因為我喺政府醫院生，開完刀24小時後拔走尿袋同生理鹽水可以落床後，bb就推返嚟我身邊自己照顧，嗰時未上奶個囡真係全程喊，真係用盡力頂住個傷口痛。不過我又真係食咗2、3次止痛藥就冇食，諗住頂到就無謂食，我第5日出院仲係行返屋企 (25分鐘左右）好好彩喺公立醫院遇到好醫生 (因為隨機的)
你食咗成個月止痛藥應該真係好辛苦，咁小豬嗰時瞓得咁差真係令你百上加斤囉！真係大家都一殻眼淚 lol